Poslovne vijesti - Makedonija

„Зелени“ кредити за инвестиции во обновливи извори на енергија

Компаниите да инвестираат во нови технологии и да го искористат потенцијалот на Македонија за производство на енергија од обновливи извори, препорачаа учесниците на семинарот „Технологија на биогорива, опрема и употреба“ во организација на Стопанската комора на мал бизнис.

За ефикасно искористување на енергијата од сонцето, ветерот, биомасата и природниот гас, неопходни се инвестиции за осовременување на домашните технологии, за што од неодамна домашните и странските банки започнаа да нудат поволни, „зелени“ кредити под повластени услови. Употребата на обновливи извори на енергија е обврска на Македонија како кандидат за членство во Европската унија. До 2020 година, според европските закони, 20 проценти од производството на енергија треба да биде од обновливи извори. Крајниот бенефит е намалување на емисијата на стакленички гасови во атмосферата.

„Користењето обновливи извори на енергија е значајно за секоја земја, а Македонија може значаен процент од неопходната енергија да ја добива од биомаса“, истакна заменик-министерката за животна средина и просторно планирање Соња Лепиткова, и потенцира дека за таа намена може да се добијат пари од Европската унија.